Leif Mohr Kring Føroyar: Punkterað hjól steðgaði tvídysti

Jákup Petur Eliassen vann stóru fimm daga súkklukappingina, Leif Mohr Kring Føroyar, triðja árið á rað.

Hann var heili 19 minuttir framman fyri næstfremsta súkklaran, Bergtór Tórsteinsson, men tað kundi verið øðrvísi, um Pauli Poulsen ikki var óheppin og punkteraði á triðja teini á Sandoynni.

Pauli Poulsen vann nevniliga einkultstartin í Eysturoynni fyrsta dagin, og tá hann punkteraði, var hann samanlagt góðan hálvan annan minutt framman fyri Jákup Petur Eliassen.

Pauli Poulsen kom ikki á mál, kundi tí ikki longur vinna Kring Føroyar, og Jákup Petur Eliassen var ov sterkur fyri hinar menninar.

Súsanna Skylv suveren

Tað var ein kvinna, sum átti næstbestu tíðina yvirhøvur. Súsanna Skylv vann suverent hjá kvinnum, og hon vísti sína styrki við at geva monnunum skarpan gang. 

Á fjórða teininum í Suðuroynni fylgdi hon Jákup Peturi Eliassen allan vegin og fór fyrst um mállinjuna.

Sterki triatleturin brúkti súkklukappingina sum liður í fyrireikingunum til kappingar seinni í summar, og nógv bendir á, at hon er væl fyri í ár.

Tilsamans 34 súkklarar vóru við í Leif Mohr Kring Føroyar í ár.