Betri ferðasamband og farstøð í Hesti

Erla Kongsdóttir hevur silgt á Hestleiðini síðan í summar, og nú er eisini ein nýggj farstøð, ella eitt bíðirúm, bygt á keiini til tey ferðandi. Áðrenn hesa farstøðina var tað vanligt, at fólk noyddust at bíða uppi í bygdini eftir at ferjan nærkaðist landi, og síðan at skunda sær oman á keiina.

Á hátíðarhaldi í dag fegnaðust hestfólk um betraða sambandið við meginøkið, nú Erla Kongsdóttir kann sigla upp í fimm ferðir út í Hest um dagin.

Grøn farleið um Hestfjørð

Um alt gongst sum ætlað fer tvíkiljan Erla Kongsdóttir einans at brúka battarí, ella el-orku, tveir túrar um dagin. Niels Juel Arge, stjóri á Strandferðsluni, sigur, at ferjan er trygg og hóskar seg væl til hesa leiðina. Umframt, at hon er ein grønari loysn, nú tað ber til at skifta ímillum at hon brúkar battarí og diesel.

- Nú er bert eftir at fáa regluligt bussamband av Gomlu rætt til Havnina, heldur Petur Lyngvej, sum býr í Hesti.

Og bussamband er á veg, sigur Kári Johansen, formaður í Havnanevndini. - Ætlanin er, at tað skal bera til at fáa býarbuss av og á Gomlu rætt eftir tørvi. Hetta verður helst sett í verk innan ein mánað, sigur hann.

Erla Kongsdóttir tekur 96 ferðafólk, lættari farm og upp til tríggjar bilar.