Talv: Metluttøka til Janus Open

Góðir 100 telvarar tóku lut í talvkappingini Janus Open, sum var á Eiði um vikuskiftið. Kappingin var til minnis um Janus í Løðuni, sum doyði í fjør, bert 46 ára gamal.

Hann var ein eldsál í talvfelagnum Róki í Sundalagnum.

Talan var um metstóra luttøku til eina talvkapping í Føroyum yvirhøvur. Fleiri útlendskir talvarar vóru við, men nógvir ungir og lutfalsliga óroyndir føroyskir telvarar sótu eisini við borðini um vikuskiftið. 

Endin var, at danski Casper Liu vann kappingina við seks og einum hálvum stigi. Besti føroyingurin gjørdist Luitjen Akselsson Apol, sum endaði á fjórða plássi við seks stigum.