Beinta tekur sær av eymum kroppum í strævnari dystarskrá

Tríggir dystir upp á fimm dagar. Tað krevur nógv at vera við á hægsta stigi í altjóða hondbólti.

Kropsliga kravdu dystirnir móti Montenegro og Spania nógv av spælarunum, sum eru nógv inni á gólvinum.

- Tær fáa nøkur knubb og summar av teimum søgdu, at tær føldu sum um at tær vóru blivnar yvirkoyrdar.

Føroysku hondbóltskvinnurnar eru væl fyri, men tað merkist at tær hava verið ígjøgnum eina harða viku, sigur Beinta Bendix Laursen til seinnapartsvenjingina í Dortmund ídag.

Nógv er á skrá hvønn dag, men fysioterapeuturin er altíð til reiðar at viðgera eymar vøddar og liðir hjá teimum, sum hava tørv á tí.