Elias takkaði fyri hjálpina eftir søguligan sigur

Tá Elias Ellefsen á Skipagøtu mátti fara skaddur av vøllinum undir dysti í týsku Bundesliguni stutt fyri jól, mundu nógvir føroyingar óttast tað ringasta.

Fór føroya størsta hondbóltsstjørna at røkka EM-endaspælinum, spurdu helst fleiri, ikki minst høvuðspersónurin sjálvur.

 - Tá eg fekk handan skaðan í desember, tá stóð eitt sindur á. Eg var bangin fyri, at eg ikki náddi at blíva klárur, men tíbetur hava vit øgiliga nógv fólk, sum hava hjálpt til, segði Elias Ellefsen á Skipagøtu eftir dystin ímóti Montenegro.

At kalla tað dyst, er at gera ov lítið av. Føroyar snøgt sagt blástu mótstøðuliðið av vøllinum á ferðini til fyrsta EM-sigurin hjá manslandsliðnum, og enn sum áður stjórnaði Elias Ellefsen á Skipagøtu føroyska spælinum við millimetur-neyvleika. Tí takkaði hann eisini teimum, sum høvdu gjørt sítt til, at hann kundi standa á vøllinum og fegnast saman við liðfeløgunum og teimum túsundtals føroyingunum í Unity-leikhøllini.

 - Eg vil fegin siga túsund takk við øll, sum hava hjálpt. Tey vita, hvørji tey eru. Og Tom (partur av venjarahópinun, blaðm.) hevur eisini verið fantastiskur. Tað er fantastiskt, at eg kundi vera við kortini, segði Elias Ellefsen á Skipagøtu.

Føroyar vunnu heili 37-24. Av hesum átti Keil-maðurin níggju mál, fleiri upplegg og um sann at hann ikki fekk eina 'bjarging' aftur hesa ferð, tá montonegrinar royndu at skjóta í tómt mál. Eftir sannan uppvísningshondbólt rósti hann kortini verju- og málmansspælinum.

 - Vit høvdu fyrireika okkum ótrúliga væl, og verjan var fantastisk, og Pauli uppaftur meir fantastiskur í málinum. Søguligi sigurin gevur Føroyum góð kort á hondina undan síðsta umfarinum í bólkaspælinum týsdagin.