Uppskot: Skulu tosa føroyskt í rættinum

Tjóðveldi hevur skotið upp at heita á landsstýrið um at leggja lógarupskot fyri tingið, sum tryggjar, at føroyskt verður rættarmál burturav.

Tjóðveldi sigur, at tað er sjálvsagt, at føroyskt skal vera rættarmál. 

Fólk, sum koma í rættarskipanina, eru kanska í veikastu støðu nakrantíð, og at skula tosa eitt annað mál, kann gera støðuna enn verri.

Tulka til danskt

Tjóðveldi heldur, at tað átti at verið soleiðis, at starvsfólk í rættinum hevði møguleika at brúka tulk eftir tørvi at tulka føroyskt til danskt.

Tað hevur eisini týdning fyri menningina av einum føroyskum løgfrøðimáli, at føroyskt er rættarmál.

At alt skrivligt samskifti verður á føroyskum, kann stuðla undir, at vit eru farin at bjóða løgfrøðilestur á Fróðskaparsetrinum, sigur Tjóðveldi í viðmerkingum til uppskotið.