Maðurin skuldsettur fyri manndráp

Norska løgreglan handtók í morgun vinnulívsmannin, Tom Hagen, í sambandi við málið um konu hansara, Anne-Elisabeth Hagen, sum er horvin.

Hann er skuldsettur fyri manndráp, ella fyri at hava verið við til at fremja manndráp.

Løgreglan og hundar kanna í løtuni húsini hjá teimum Í Lørenskog og á arbeiðsplássinum hjá Tom Hagen.

Eingin hevur sæð ella frætt frá Anne Elisabeth Hagen síðani 31. oktober 2018. Tá hevði løgreglan longu kannað málið í fleiri mánaðir, áðrenn tað kom alment fram. 

Málið varð í fyrstu atløgu kannað sum eitt mál um burturflyting við kravi um upphædd fyri at lata hana leysa. Seinni varð høvuðsástøðið broytt til manndráp.