Frágreiðing: Leigugjald brúkast til viðlíkahald

Almennir stovnar og ráð skulu gjalda húsaleigu, hóast tey eru í bygningum, sum landið eigur.

Tað stendur í frágreiðingini "Landsverk - avbjóðingar og átøk", sum Sigurd L. Lamhauge, stjóri á Landsverki, gav Jørgeni Niclasen, landsstýrismanni, í gjár.

Í frágreiðingini verður mælt til, at almennir stovnar og ráð í framtíðini gjalda eina lítla húsaleigu fyri tær ognir, sum landið eigur, til viðlíkahald. 

Húsaleiga hevði givið størri gjøgnumskygni

Mett verður, at 185 krónur fyri fermeturin um árið í húsaleigu høvdu givið 46 milliónir krónur. 46 milliónir krónur eru nóg mikið fyri at sleppa undan virðisminking og viðlíkahaldseftirsleipi. 

Og húsaleiga hevði givið størri gjøgnumskygni í raksturin hjá almennum stovnum og ráðum, stendur í frágreiðingini hjá Landsverki.

Tá Sigurd L. Lamhauge varð settur í starvið sum stjóri á Landsverki á heysti í fjør, varð hann biðin um at lýsa og meta um virksemið hjá Landsverki og, um neyðugt, endurhugsa tilverugrundarlagið hjá stovninum.

Tað hevur hann nú gjørt, og landsstýrið hevur fingið úrslitið.