Hondbóltur: Mótstøðuliðini eru funnin

Føroyska manslandsliðið í hondbólti skal spæla ímóti Kekkia, Russlandi og Ukreina í undankappingini til evropameistaraheitið í Ungarn og Slovakia í 2022. 

Tað varð greitt eftir lutakastið fyri løtu síðani.

Undankappingin byrjar eftir ætlan tíðliga í november. Nummar eitt og tvey umframt fýra teir bestu av teimum, sum enda á triðja plássi, sleppa í endaspælið. 

Tilsamans 20 av teimum 32 liðunum í undankappingini spæla seg í endaspælið. 

Tveir dystir skulu spælast í november í ár, tveir í mars 2021 og tveir um mánaðarskifti apríl mai 2021, skrivar Hondbóltssambandið.

Ikki er greitt enn, hvar heimadystirnir hjá Føroyum skulu spælast.