Ferðavinnan er komin upp í hálva ferð

Føroyar lótu lutvíst upp fyri ferðafólki 15. juni. Ferðandi úr Danmark, Grønlandi, Íslandi, Noregi og Týsklandi kundu tá ferðast til Føroya.

Tríggjar dagar seinni boðaði danska stjórnin frá, at markið læt upp fyri øllum ES-limalondum, londunum í Schengen-samstarvinum og Bretlandi.

Ein treyt er kortini, at smittutalið í londunum er lítið  - undir 20 smittað fyri hvørjar 100.000 íbúgvar um vikuna.

Hetta hevur havt við sær, at ferðafólkatalið til Føroya er vaksið, og fleiri ferðafólk eru at síggja í føroyska samfelagnum.

Helvtin

Smyril Line sigur í dag, at ferðafólkatalið við Norrønu er gott og væl helvtin av tí, sum tað vanliga plagar at vera.

Í hotellvinnuni eru boðini tey somu. Gistingarnar eru umleið helvtina av tí, tær vanliga eru hesa ársins tíð.

Tey flestu, sum gista, eru danir, men føroyingar gista eisini á hotellunum.