FMR: Vit kunnu ikki toyggja okkum longri

- Vit kunnu ikki toyggja okkum longri, tí tað ber ikki til, at eitt felag skal seta seg fram um øll onnur, og aftur hesa ferð krevja meira enn hini. Vit kunnu ikki góðtaka ein ótálmaðan lønarvøkstur á almenna arbeiðsmarknaðinum.

Tað sigur Fíggjarmálaráðið í dag í eini viðmerking til samráðingarnar við sjúkrarøktarfrøðingarnar, sum eru í verkfalli.

Sí viðmerkingina frá Fíggjarmálaráðnum her.

Fíggjarmálaráðið sigur, at høvdu sjúkrarøktarfrøðingarnir góðtikið semingsuppskotið, sum varð lagt fyri partarnar, hevði grundlønin verið 28.082 kr., og endalønin hevði verið 36.355 krónur um mánaðin, tá viðkomandi hevur verið í starvi í 10 ár.

Við eftirløn verður endalønin 41.809 kr. um mánaðin, sigur Fíggjarmálaráðið.

Báðir partar tapt

Sjúkrarøktarfrøðingarnir vrakaðu semingsuppskotið.

Fíggjarmálaráðið sigur, at tað hevur toygt seg langt fyri at finna eina semju, og nógv krøv eru slept á vegnum. 

Samráðingar eru torførar, men tá tær ikki bera á mál, hava báðir partar vunnið og tapt. Tað kann ikki bara vera ein vinnari, sigur Fíggjarmálaráðið um samráðingarnar við sjúkrarøktarfrøðingarnar.