Tunnilsgjaldið skal niður

Undir yvirskriftini "TUNNILSGJØLDINI SKULU NIÐUR" setur tingmaður fyri Sambandsflokkin, Jaspur Langaard, fram eitt, hann kallar ófrávíkiligt krav. Jaspur Langaard, vil hava, at gjaldið fyri at koyra í Eysturoyartunlinum skal lækkast. 

-  Politikkararnir valdu at seta eina nevnd og stjóra at stýra felagnum, og vit kunnu í dag ásanna, at tey hava gjørt eitt gott arbeiði, tá talan er um bygging av tunlinum, men tá talan er um prísásetingina fyri nýtslu av tunnlinum, hava tey dumpað.

Vit vita, at verður prísurin rímuligari, koma nógv fleiri at brúka tunnilin, og harvið eisini at gjalda fyri tunnilin. Hetta sigur allur logikkur, og hetta hava vit eisini sæð í hinum tunlunum.

Um tunnilsfelagið ikki sjálvt velur at tillaga tunnilsgjøldini, verða vit noydd at gera politisk inntriv, til frama fyri bæði borgaran og samfelagið sum heild

Tunnilsgjøldini muga og skulu niður - hetta er eitt ófrávikiligt krav, sigur Jaspur Langaard. 

Alt skrivið kann lesast her

Kostnyttukanning

Tingmaðurin fyri Sambandsflokkin, heldur at kostnyttukanningin, sum er gjørd av landsverki, vísir, at neyðugt er at lækka prísin. 

-  Borgarnir spara bensin, slit av dekkum og slit av bilum - landið sparir slit av vegum. Alt hetta verður tikið við í eini kost-nyttu kanning - og metir Landsverk, at árliga sparingin av hesum er áleið 60-70 mó. kr.

Umhvørvisliga vil nýtslan av tunlinum hava við sær, at vit árliga brúka nógv minni av svartari orku, sigur Jaspur Langgaard.