Lønargjaldingarnar minkaðu 20 prosent

Lønarútgjaldingarnar í gistingar- og matstovuvinnuni minkaðu umleið 20 prosent í fjør samanborið við árið fyri, skrivar Vinnuhúsið í dag.

95.000 gistingar vóru í føroysku gistingarhúsunum í fjør. Afturgongdin er 43 prosent sammett við 2019.

Talið á ferðafólkum, sum komu um fløgvøllin, minkaði eisini nógv.

Korona hevur flutt ferðavinnuna fleiri ár aftur í tíðina, siga tey í Vinnuhúsinum.

Framvegis døpur útlit

2020 var annars árið, tá ferðavinnan av álvara skuldi taka dik á seg, men soleiðis skuldi ikki ganga.

Útlitini eru framvegis døpur, og tað er einki, sum bendir á, at vinnan í næstum skal fáa ferðina upp aftur.

Vinnuhúsið sigur, at almennu hjálparpakkarnir hava bøtt upp á ringastu avleiðingarnar, men avleiðingarnar av almennu tilmælunum hava rakt nógv harðari, enn hjálparpakkarnir hava hjálpt.