Taka støðu til AstraZencia í dag

Fyrrapartin fæst at vita, um nógv umrødda koronukoppingarevnið, av merkinum AstraZenica, skal brúkast aftur í danska kongsríkinum.

11. mars góvust donsku heilsumyndugleikarnir fyribils at brúka AstraZenica-koppingarevnið, tí illgruni var um vanda fyri álvarslig hjáárin av tí. 

Tað bar nevniliga ikki til at útihýsa, at koppingarevnið kann elva til blóðtøpp.

Danska heilsustýrið og heilivágsstýrið hava felags tíðindafund fyrrapartin um málið.

150.000 koppsettir

Áðrenn givist varð at brúka AstraZenica 11. mars, høvdu umleið 150.000 danir fingið hetta koppingarevnið. Tað er tó ikki brúkt í Føroyum.

Verður AstraZenica tikið í nýtslu aftur, meta donsku heilsumyndugleikarnir, at allir danir verða liðugt koppsettir fyri koronu 25. juli. Men uttan AstraZenica verður ikki komið á mál við koppsetingini fyrr enn 18. august.