Ravmagnsútbúnaður í køkinum sendur til Danmarkar

Ravmagnsútbúnaður, sum varð funnin í brunatoftini í Sandvík, er sendur til Danmarkar, har hann skal kannast.

Eini sethús í Sandvík brunnu í grund seinnapartin fríggjadagin 21. mai. Tveir bilar fóru eisini í eldinum, og grannahúsini fingu skaða av hitanum.

Fimm fólk búðu í húsunum, men bara eitt teirra, ein maður, var inni, tá eldur kom í. Maðurin slapp út í øllum góðum.

Brandteknikarar hjá politinum vóru í Sandvík mánadagin. Teir tóku ravmagnsútbúnað, ella elinnstallatiónir, sum vóru í køkinum, og sendu til Danmarkar til kanningar.