Ætla at leingja avtalu um vinnuferðir til Føroya

Skipaða samstarvið millum Tórshavnar kommunu, Visit Tórshavn og Visit Faroe Islands um vinnuferðir til Føroya verður viðgjørt á býráðsfundinum í Havn í kvøld.

Avtalan um samstarvið varð gjørd longu í 2019.

Avtalan er galdandi til 1.januar 2022. Nú skal støða takast til, um nýggj avtala skal gerast. Hon skal galda í fýra ár í staðin fyri trý ár. 

Býráðið sigur, at verandi samstarvsavtala hevur virkað væl, og eru partarnir sum heild nøgdir við samstarvið. 

25 tiltøk í fyrraárið

Í 2019 vóru 25 vinnuferðatiltøk í Havn, tá eru virkisferðirnar ikki taldar við. 

Men í fjør vóru bara trý tiltøk. Ætlanin var at hava 25 vinnuferðatiltøk í Føroyum í fjør. Nógv eru útsett til 2022.

Avtalan fer at kosta kommununi tvær milliónir krónur.

Visit Faroe Islands rindar eisini tvær milliónir.

Umsitingin, Vinnunevndin og Fíggjarnevndin hjá kommununi mæla til at gera avtalu fyri árini 2022-2026.