Pengarnir tróta ikki - serlæknarnir gera

Í 2015 var ein serlækni í eldrasjúkum settur í Landssjúkrahúsinum í nakrar mánaðir.

Men síðani tá hevur eingin serlækni í eldrasjúkum verið í starvi í Føroyum.

Tað sigur Kaj Leo Holm Johannesen, landsstýrismaður, í svari til Tord Niclasen, løgtingsmann.

Hann sigur í svarinum, at leiðslan í Sjúkrahúsverkinum veit ikki um nakran føroying, sum er serlækni í eldrasjúkum.

Og nærum vónleyst er at fáa nakran slíkan lækna, men roynt verður aftur í næstum.

Eingin velur sergreinina

Medisinski depilin í Landssjúkrahúsinum hevur spurt Región Øst í Danmark, um ein lækni kann byrja høvuðsútbúgvingina í geriatri í Landssjúkrahúsinum og gera seg lidnan í Danmark. 

Men tað er trupult at fáa yngri læknar at velja sergreinina geriatri, eldrasjúkur, og ikki er lokkandi at arbeiða sum einsamallur serlækni í eldrasjúkum í Føroyum, svarar Kaj Leo Holm Johannesen.

Tordur Niclasen vísir á, at í samgonguskjalinum stendur, at serlækni í eldrasjúkum skal setast í Føroyum.