Brasilski forsetin skal ákærast fyri brotsverk móti mannaættini

Ein nevnd í brasilska senatinum hevur kannað, hvussu Jair Bolsonaro, forseti, hevur handfarið koronu, og nevndin sigur í niðurstøðuni, at forsetin eigur at vera ákærdur fyri lógarbrot í fleiri førum.

Tað skrivar AP.

Sjey av limunum í serligu nevndini mæla til, at forsetin verður ákærdur, meðan fýra limir atkvøddu ímóti at góðkenna frágreiðingina, sum varð almannakunngjørd í farnu viku.

Í frágreiðingini verður mælt til, at forsetin verður ákærdur fyri ólógliga at hava nýtt almennar pengar, at hann skal hava mælt til kriminalitet og ikki minst fyri brotsverk ímóti mannaættini.

Brasilski ríkisadvokaturion fær frágreiðingina í dag, sigur senatorurin, Omar Aziz, sum var formaður í kanningarnevndini.

Bolsonaro hevur sjálvur sett ríkisadvokatin í starv, og tí er óvist, um forsetin verður ákærdur.

Yvir 600.000 fólk í Brasilia eru deyð av koronu.