Miðstovnurin verður verandi í Kongagøtu í Havn

Annfinn Brekkstein, formaður í mentanarnevndini í Tórshavnar kommunu, sigur, at kommunan hevur tikið áheitanina frá foreldraráðnum í Miðstovninum til eftirtektar, og Miðstovnurin verður tí verandi í Kongagøtu í Havn. 

Fyrr í vikuni varð skriv sent til Tórshavnar kommunu, har foreldraráðið í barnagarðinum Miðstovnurin fanst at, at kommunan hevði ætlanir um at flyta framhaldsdeildini í Sankta Frans skúla í Miðstovnin at vera, uttan at boða foreldrunum frá.

Nógv rok hevur verið um Miðstovnin seinastu tíðina. Fyrr í ár segði dagstovnaleiðarin í Miðstovninum seg úr starvi, tí arbeiðsumstøðurnar  vóru ótolandi, - m.a. vantandi játtan og vantandi starvsfólk. 

Annfinn Brekkstein vil einki siga um ætlanina, men sigur í stuttari viðmerking við Kringvarpið, at barnagarðurin verður verandi í Kongagøtu, og at kommunan nú arbeiðir við at finna aðra loysn til framhaldsdeildina.

Skúlin á Fløtum, Skúlin í Kongagøtu, Tórshavnar kommuna