Nógvir ósvaraðir spurningar um Suðuroyartunnilin

Samgongan tekur ikki undir við uppskotinum til samtyktar hjá Tjóðveldi um at fáa landsstýrið at fyrireika og leggja fyri løgtingið øll neyðug lógaruppskot um undirsjóvartunnil til Suðuroyar.

Í álitinum hjá Rættarnevndini sigur meirilutin, at hann tekur undir við, at fyrireikandi arbeiðið heldur fram.

Men hann ásannar samstundis, at enn eru sera nógvir ósvaraðir spurningar í sambandi við verkætlanina.

Hann heldur tí ikki, at eitt lógaruppskot eigur at vera tað fyrsta, sum verður gjørt. 

Brúka onnur amboð

Meirilutin sigur, at Rættarnevndin hevur fingið at vita, at tunlar onkrastaðni verða gjørdir við heilt øðrum amboðum enn teimum, sum higartil hava verið brúkt í Føroyum.

Hetta kann gera, at talan verður um ein heilt annan kostnað og eina heilt aðra byggitíð.

Uni Rasmussen, landsstýrismaður, sigur, at flokkarnir høvdu fund um Suðuroyartunnilin fyrst í apríl.

Væntandi verður fundur aftur fyri summarfrítíðina, sigur hann.