Nú byrjar eftirlitið við viðgerðarstøðum

Í heyst fer landslæknin av álvara at byrja eftirlitið við viðgerðarstøðum í Føroyum.

Tá verður fyrsta eftirlitið gjørt á staðnum. Viðgerðarstøðini fáa fráboðan um eftirlitið seks vikur frammanundan. 

Men longu nú er umsitingarliga eftirlitið byrjað. 

Danska kunngerðin, Tilsynsbekendtgørelsen, um slíkt eftirlit kom í Føroyum 1.juli.

Hon sigur, at viðgerðarstøð, almenn og privat, skulu skrásetast og koma undir eftirlit.

Tíðindaflutningur eisini brúktur

Eftirlitið verður fyrst og fremst við teimum støðum, har vandin hjá trygdini hjá sjúklingunum er mettur at vera størstur.

Millum annað verður tíðindaflutningur brúktur, tá hesar metingar vera gjørdar. 

Ætlanin er at hava eftirlit við tíggjunda hvørjum viðgerðarstaði um árið. 

Frágreiðingar um eftirlit á viðgerðarstovnum vera almannakunngjørdar, tær vera lagdar á heimasíðuna hjá landslæknanum. Har vera eisini aðrar upplýsingar um eftirlitini.

Í ringasta føri kann landslæknin krevja, at viðgerðarstøð heilt ella partvíst gevast, er vandin har stórur hjá trygdini hjá sjúklingum.