Karim Benzema og Alexis Putellas eru ársins leikarar í Evropa

Í sambandi við lutakastið til ársins Champions League-bólkaspæl, vóru ársins leikarar og venjarar eisini valdir. 

Heilt stóra stjørnan í evropeiskum fótbólti í fjør, Real Madrid-áleyparin og -liðskiparin Karim Benzema, varð valdur til ársins leikari í evropiskum fótbólti við monnum. 

Tað bleiv hann framman fyri liðfelagan Thibaut Courtois, málverja í Real Madrid, og Kevin de Bruyne, miðvallara í Manchester City. 

Ársins leikarar í Evropa, Karim Benzema

Toppskjútti

34 ára gamli Karim Benzema leiddi Real Madrid til sigurin í Champions League-finaluni móti Liverpool, og var tað fimta ferðin, at Benzema vann Champions League við spanska høvuðsstaðarfelagnum. 

Franski áleyparin bleiv eisini toppskjútti í kappingini við 15 málum. 

Á vegnum móti finaluni, megnaði Real Madrid at vinna móti PSG, Chelsea og Manchester City, áðrenn 1-0 sigurin á Liverpool í finaluni. 

Real Madrid vann eisini spanska meistaraheitið. 

Alexia Putellas

Alexis Putellas fyri aðru ferð

Hjá kvinnunum var tað aðru ferð á rað spanska Alexis Putellas úr Barcelona, ið vann heiðurin sum besti leikari í Evropa. 

28 ára gamli miðvallarin var liðskipari á Barcelona liðnum, ið tryggjaða sær spanska meistaraheitið við at vinna allar dystirnar - ja, tær vunnu allar dystirnar. Málmunurin var 148, tí Barcelona kvinnurnar skoraðu 159 mál, men lótu einans 11 fara inn. 

Barcelona spældi seg eisini í Champions League-finaluna móti Olympique Lyon, sum Barcelona tapti 1-3. Málið hjá Barcelona skoraði Alexis Putellas. 

Putellas var eisini millum málskjúttarnar, tá sterka spanska kvinnulandsliðið vann heili 10-0 móti Føroyum á Tórsvølli í fjør. 

Tíverri kom Alexis Putellas haltandi upp á pallin at taka ímóti heiðrinum sum ársins leikari í Evropa. Beint áðrenn hon skuldi spæla við spanska landsliðnum í EM-endaspælinum, sleit hon krossbandið. 

Carlo Ancelotti

Ársins venjarar blivu ávikavist Carlo Ancelotti, ið er venjarin hjá Real Madrid, og Sarina Wiegman, ið vandi Ongland, ið vann evropameistaraheitið á heimavølli í summar. Sarina var tíverri ikki til staðar at taka ímóti heiðrinum.