Sálarliga heilsan versnar

– Tørvur er á strategium, ið fevna um allar borgarar fyri at fremja og verja sálarliga heilsu, stendur millum annað í eini nýggjari grein í Open Access Government, sum snýr seg um “ABC fyri sálarliga heilsu” kring heimin.

Magni Mohr, professari á Fróðskaparsetrinum og formaður í Fólkaheilsuráðnum, hevur skrivað greinina saman við australskum, donskum, norskum og svenskum ABC-samstarvsfeløgum.

Víst verður millum annað á, at bæði fyribyrging fyri ávísar málbólkar og universell sálarlig heilsufremjan kunnu minka um vandan fyri, at sálarliga heilsan gerst verri.

Fevnir um øll
- Av tí at universell sálarlig heilsufremjan fevnir um øll, kann tað røkka út til og ávirka størri partar av fólkunum í einum samfelagi enn fyribyrging, stendur millum annað í greinini.

“ABC fyri sálarliga heilsu” er heimsins fyrsta víðfevnda sálarliga heilsufremjandi herferð, sum fevnir um allar borgarar og er grundað á samfelagið og nærumhvørvið.

Átakið “ABC fyri sálarliga heilsu” fevnir um tríggjar boðskapir, ið eru grundaðir á gransking, og sum fremja sálarliga vælveru og kunnu brúkast av øllum uttan mun til sálarliga heilsustøðu.