Síðsti dýri biðidagur sum frídagur hjá dønum

Í dag er síðsti Dýribiðidagur hjá dønum sum frídagur. Frídagurin varð endaliga strikaður við 3. viðgerð í Fólkatinginum hin 28. februar.

Anne Marie Poulsen Toldbod, sóknarprestur, til síðstu Dýra biðidagsgudstænastu í Bregnet Kirke í Rønde á Djurslandi, fríggjadag 5. mai 2023.

Mynd: Mikkel Berg Pedersen/Ritzau Scanpix

Sissal Grækarisdóttir Magnussen

05.05.2023 - 11:35

Tá danska stjórnin stutt fyri jól boðaði frá, at hon arbeiddi við at broyta dýra biðidag, soleiðis at hann gjørdist vanligur arbeiðsdagur, vóru fleiri, sum vóru ímóti hesum.

Frídagurin varð tó strikaður, eftir at andstøðuflokkurin, Radikali Vinstri, boðaði frá, at hann eisini tók undir við uppskotinum hjá stjórnarflokkunum.

Í sambandi við uppskotið gjørdu andstøðuflokkarnir av at ógilda allar clearings-avtalur. Tað merkti, at ávísur spenningur var um, hvussu stórur meirilutin fór at vera í tingsalinum.

Tí tryggjaði danska stjórnin sær, at føroysku fólkatingslimirnir vóru til reiðar at atkvøða fyri uppskotinum um neyðugt. Hetta gjørdist tó ikki neyðugt hjá føroysku fólkatingslimunum.

Dýribiðidagur verður tí vanligur arbeiðsdagur í Danmark frá 2024 at rokna.