Skulu sleppa at brúka móðurmálið í Fólkatinginum

Formaðurin í danska flokkinum Liberal Alliance heldur, at føroyingar og grønlendingar skulu sleppa at tosa sítt egna móðurmál í Fólkatinginum. 

Alex Vanopslagh skrivar á sínum facebook-vanga, at hann skilir, hví grønlendski fólkatingslimurin, Aki-Matilda Høegh-Dam, tosaði grønlendskt á fólkatingsins røðarapalli og noktaði at týða tað, hon segði. Men hann heldur kortini, at hennara máti at vísa sína ónøgd var barnsligur og ikki gagnaði endamálinum.

Aki Matilda Høegh Dam

Aki Mathilda Høegh-Dam sýtti fyri at tosa danskt í fólkatinginum fríggjadagin, tá árliga orðaskiftið um ríkisfelagsskapin var fyri. (Mynd: Ritzau Scanpix)

- Ríkisfelagsskapurin hevur stóran týdning fyri okkara felags søgu og samleika, og eg vóni, at ríkisfelagsskapurin heldur á nógv ár fram. Men um ríkisfelagsskapurin skal varðveitast og styrkjast, skulu vit tora at tosa um, hvussu felagsskapurin skilabest verður innrættaður. Tað ber eisini í sær, at vit geva føroysku og grønlendsku fólkatingsumboðunum møguleika at tosa sítt egna móðurmál í fólkatinginum við tulki, um tey vilja tað, sigur formaðurin í Liberal Alliance, Alex Vanopslagh.