Fylgisveinasambandið nóg trygt hjá bankakervinum

Fylgisveinasambandið við útheimin er nóg gott til at tryggja, at mest týðandi dáturnar kunnu flytast, hóast sjóvegis kaðalsambondini vera kvett. 

Tað sigur Høgni Hoydal, landsstýrismaður, í svari til Erling Eidesgaard, løgtingsmann.

Hann spurdi, hvørjar avleiðingarnar vera fyri føroysku peningastovnarnar, fyri peningaflytingar og handil í Føroyum við gjaldskortum, um okkara sjóvegis kaðalsambond til útheimin slitna.

Landsstýrismaðurin svarar eisini, at trupult er at siga, hvørjar avleiðingarar vera, skuldi alt sambandið verið kvett og allar dáturnar vóru í útlandinum. 

Bakkast at flyta skipanir av landinum

Hann sigur, at fyri føroysku KT-vinnuna og føroyska samfelagið var tað eitt ómetaliga stórt bakkast, tá føroysku peningastovnsskipanirnar vóru fluttar av landinum.

Í 2016 var kannað, um peningastovnsskipanirnar kundu yvirtakast.

Tá var niðurstøðan, at tað kundu tær við fyrimuni, bæði fyri peningastovnarnar og fyri føroyska samfelagið sum heild. 

Felagið Peningastovnar var tó ikki samt.

- Kanningin frá 2016 eigur at verða fylgd upp, og tað ætli eg at taka stig til, sigur Høgni Hoydal, hóast einki stendur um tað í samgonguskjalinum.