Uppsjóvarvinnan rindaði 2,1 milliard í tilfeingisgjaldi

Í 2019 vóru tilfeingisgjøldini av bruttoúrslitinum hjá uppsjóvarvinnuni 27 prosent.

Í 2020 og 2021 vóru tey 23 prosent.

Talið fyri 2022 er ikki tøkt enn.  

Ruth Vang, landsstýriskvinna, hevur svarað spurningi frá Bjarna Hammer, tingmanni, um veiðigjøld.

Tilfeingisgjøldini eru hækkað síðani 2012, tá tey vóru níggju prosent av bruttoúrslitinum. Tey vóru 17 prosent í 2013 og 24 prosent í 2017 og 2018.

Ruth Vang

Ruth Vang, landsstýriskvinna, hevur svarað fyrispurningi um tilfeingisgjøld í uppsjóvarvinnuni. 

Rindað 2,1 milliard kr. 

Árini 2012 til 2021 rindaði uppsjóvarvinnan tvær milliardir og 136 milliónir í tilfeingisgjøldum.

Serstaki partafelagsskatturin, sum var árini 2012 til 2016, er ikki taldur við sum tilfeingisgjald. 

Uppsjóvarvinnan er nágreinað sum tað, sum Hagstovan hevur bólkað sum fiskiskap til ídnað.

Tøkugjald

Seinastu fimm árini hevur tøkugjaldið verið millum 9,3 prosent og 12,8 prosent av bruttoinntøkuni hjá alivinnuni.

Tað sigur Høgni Hoydal, landsstýrismaður, í svari til Bjarna Hammer.

Tøkugjaldið, ella loyvisgjaldið, kom í 2014.

Árini 2014 til 2021 rindaði alivinnan góðar 934,8 mió. kr. í tøkugjaldi. Talið fyri 2022 er ikki tøkt enn.

Roknskaparliga vera útreiðslur til tilfeingisgjøld og tøkugjald drignar frá nettosøluni, áðrenn komið verður til bruttovinningin, ella bruttoúrslitið.