Framløga í tinginum í dag

Løgtingsfundur verður í dag klokkan fýra, har bara framløga er á skránni.

Fyrrapartin hava tær báðar nevndirnar, sum enn hava mál eftir at avgreiða, fund.

Uttanlandsnevndin viðger uppskotið hjá landsstýrinum um ikki at skula í løgtingið við ætlaðum tiltøkum móti Russlandi og Hvítarusslandi. Tað eru tiltøk, sum ávirka fiskivinnuavtaluna ella útflutningin av fiskavørum og matvørum.

Partafelagið Vónin, landsstýrismaðurin í fiskivinnumálum og Vørn og løgmaður hava fingið fundarboð.

Trý mál í fíggjarnevndini

Fíggjarnevndin hevur framvegis trý mál.

Tey eru uppskotini um at broyta kapitalvinningsskattalógina, uppskotið um fyrsta byggistig, nú skúlabygningarnir á Frælsinum í Havn skulu umvælast og umbyggjast, og uppskotið til samtyktar um at gera greiðar reglur um, hvussu almennar byggiverkætlanir skulu skipast. 

Koma álit frá nevndunum í dag, vera tey viðgjørd á tingfundi mikudagin.