Fara undir Tjørnuvíkarbergholið, tá Dalsbergholið er liðugt

Ætlanin er at fyrireika bergholið til Tjørnuvíkar, so klárt er at byrja, tá Dalsbergholið er liðugt. 

Jarðfrøðiligu kanningarnar, - tann fyrsta var gjørd fyri 20 árum síðani, í sambandi við bergholið, verða væntandi lidnar í ár.

Í samferðsluætlanini hjá Landsverki fyri 2018 til 2030 eru tvær loysnir.

Mælir til longru loysnina

Eitt berghol, sum er ein kilometur og 360 metrar, frá Brúnaskarði og eitt, sum er 2,5 km., frá Marma-skallará. 

Báðar linjurnar koma út inni í dalinum í Tjørnuvík. 

Landsverk mælir til at velja longru loysnina.

Tað sigur Dennis Holm, landsstýrismaður, í svari til Kim Durhuus, løgtingsmann.

Tunnilsliðið skal gera arbeiðið

Hann sigur, at Landsverk mælir til longra bergholið, tí vegurin millum Marmaskallará og Brúnaskarð er vánaligur. 

Har er so bratt niðurfyri, at ivasamt er, um tað ber til at betra vegin nóg væl.

Tunnilsliðið hjá Landsverki skal gera bergholið til Tjørnuvíkar.

Tjørnuvík

Grót til vegarbeiði

Dennis Holm sigur eisini, at Landsverk kannar, hvat gerast skal við grótið, sum kemur úr begholinum til Tjørnuvíkar. Ein møguleiki er at brúka grótið til at betra vegirnar í økinum.

Ein annar møguleiki er at brúka grótið til Saksunarvegin.

Nógv meira grót er enn brúkast kann til vegir, so roynt verður at finna øki, har nógv grót kann leggjast.