Niðurstøða um jarðhitaboringar kemur í august

Í seinasta lagi 1. august skal Ingilín D. Strøm, landsstýriskvinna, hava fyribils niðurstøður og møgulig tilmæli um lógarbroytingar frá arbeiðsbólkinum, sum kannar dálking frá jarðhitaboringum.

Í arbeiðsbólkinum eru fólk frá Kommunufelagnum, Vinnuhúsinum og Umhvørvisstovuni.  

Ingilín D. Strøm hevur svarað Jóhannisi Joensen, løgtingsmanni.

Hann spurdi um dálking, tá borað verður eftir jarðhita.

Landsstýriskvinnan sigur, at Umhvørvisstovan upplýsir, at beinleiðis kanningar eru ikki um, hvussu boridust ávirkar náttúruna ella spillivatnsskipanir.

Samgongusamráðingar 2022, dagur 2, Ingilín D. Strøm

Ingilín D. Strøm er landsstýriskvinna í umhvørvismálum. (Mynd: Bjarni Árting Rubeksen)

Avmarkaður vandi

Umhvørvisstovan hevur tó í eina tíð tosað við borifeløg og kommunur um at gera slíkar kanningar. 

Umhvørvisstovan sigur, at kanningar í øðrum londum vísa, at um meginparturin av dustinum, serliga tungu bitlarnir, fer í bingjur, er avmarkaður vandi fyri áarlívinum.

Ingilín D. Strøm sigur í svarinum, at mett verður, at galdandi krav í Føroyum um burturbeining av tilfari frá boringum er í lagi. 

Í kunngerðini stendur, at tilfarið skal ikki fara í nærumhvørvið, tað eru áir, løkir og kloakkir ella í lendið. 

Umhvørvisstovan veit ikki um, at ítøkiliga er víst á skaða á til dømis síl í áunum, stendur í svarinum hjá landsstýriskvinnuni.