Kann vera skilagott at eftirmeta Landsbankan og Búskaparráðið

- Tað kundi verið skilagott at eftirmett skipanina við Landsbanka og Búskaparráðið.

Tað sigur Ruth Vang, landsstýriskvinna í fíggjarmálum, í svari til Eirik í Jákupsstovu, løgtingsmann.

Hann spurdi, hvørjar hugsanir landsstýriskvinnan hevur viðvíkjandi skipanini av Landsbanka og Búskaparráðið, sum var framd í 2021.

Eirikur í Jákupsstovu spurdi eisini, um landsstýiskvinnan ætlar at varðveita ella broyta verandi skipan.

Ruth Vang svarar, at málið ikki er viðgjørt í landsstýrinum enn.

Men av tí at nógvar atfinningar vóru, tá broytingin var framd, kundi tað verið skilagott við einari eftirmeting tvey ár eftir, at broytingin var framd, sigur hon.