61.000 fólk doyðu av hita í fjør

Fleiri enn 61.000 fólk lótu lív av ógvusliga hitanum, sum rakti Evropa í fjør. 

Tað hevur tíðarritið Nature Medicine roknað seg fram til, sambært The New York Times.

Hesar útrokningarnar vísa, at hóast sera nógv hevur verið arbeitt við at laga býirnar til heitari veður, hevur tað ikki borið til at fylgja við skjótu gongdini í veðurlagsbroytingunum.

- Í einari fullkomnari verð átti ongin at doyð í hita, sigur Joan Ballester, granskingarprofessari í Barcelona Institute for Global Health og høvuðsrithøvundur í greinini.

Og summarið í ár fer helst at gerast uppaftur verri. Tí, aftrat gongdini við veðurlagsbroytingum, er heimurin farin inn í eitt náttúrligt mynstur við El Niño, sum er fjórða hvørt ár. Hetta ger, at tað verður heitari í fleiri støðum í heiminum enn annars. 

ST hevur eisini júst staðfest, at fyrsta vikan í juli var tann heitasta, sum higartil er mátað.