Fólk koma í óføri av eldgosinum í Íslandi

Framvegis elvir tað til trupulleikar, at túsundtals fólk streyma til eldgosið í Fagradalsfjalli, 30 kilometrar í ein útsynning úr Reykjavík.

Íslendska politiið hevur biðið fólk um halda seg burtur frá frá gosinum, tí roykurin kann vera vandamikil at fáa í seg, men ikki øll akta.

- Vit hava hjálpt fleiri, ið annaðhvørt hava fingið løstir, ella bara hava verið útlúgvað, sigur Jón Þór Víglundsson frá íslendska landsbjargingarfelagnum við Morgunblaðið.

Hann sigur ein stóran trupulleika vera, at koma fólk sær í óføri ov nær gosinum, ber ikki til at bjarga teimum.

- Koma fólk illa fyri í einum øki við grótbræðing, kunnu vit bara fáa tey útaftur við tyrlu, men heldur ikki tað ber altíð til, sigur Jón Þór Víglundsson.

Hann leggur aftrat, at ganga fólk seg føst í grótbræðingunum frá gosinum, er ógjørligt at bjarga teimum, og um tey detta, brennast tey.