Russiski sendiharrin í Íslandi er farin av landinum

Russiski sendiharrin í Íslandi er farin haðani.

Og starvsfólkini í sendiráðnum í Reykjavík eru nú átta.

Tey vóru 20.

Í juni boðaði Ísland frá, at tað legði niður sendiráðið í Moskva fyribils tann 1.august.

Ísland hevur havt sendiráð í Moskva frá 1944.

Biðið um at minka virksemi

Samstundis var Russland biðið um at hava sum minst virksemi í Reykjavík.

Minkaða sendiráðsvirksemið er gjørt í góðum samstarvi millum londini bæði.

Þórdís Kolbrún Reykfjörð Gylfadóttir, uttanríkisráðharri, sigur við RUV, at Ísland hevur ongar avleiðingar merkt av tí, at tað steðgaði sendiráðsvirkseminum í Moskva.

Diplomatiska sambandið millum londini heldur fram. 

Føroyski sendimaðurin komin heim

Virksemið á føroysku sendistovuni í Moskva verður fyribils røkt úr Føroyum.

Sendimaðurin er komin heim. 

Einki føroyskt sendifólk verður í sendistovuni í Moskva, so leingi sum umstøðurnar eru óbroyttar, sigur landsstýrið.