Ellemann og Troels býta um ráðharrasess

Tríggjar vikur eftir at Jakob Ellemann-Jensen kom aftur úr sjúkrafarloyvi í sessin sum verjumálaráðharri, fer hann úr verjumálaráðnum at umsita búskaparmál í donsku stjórnini.

Samstundis fer Troels Lund Poulsen, búskaparráðharri, aftur í sessin sum verjumálaráðharri, sum hann røkti, meðan Jakob Ellemann-Jensen var í sjúkrafarloyvi.

Jakob Ellemann- Jensen heldur kortini fram sum varaforsætisráðharri.

Ov stór arbeiðsbyrða

Jakob Ellemann-Jensen sigur, at skal tað eydnast sær sum formanni í Vinstra at røkja formansstarvið, so flokkurin framvegis fær ávirkan í stjórnarsamstarvinum, ber ikki til at vera verjumálaráðharri samstundis.

Hann viðgongur, at uppgávurnar í verjumálaráðharranum eru so stórar, at tað krevur ein ráðharra burturav.

Tað hevur ikki eydnast donskum miðlum at fáa viðmerking frá Mette Frederiksen, forsætisráðharra, til broytingina í stjórnini.