Lokking og kynslig avnoyðsla skal verða kynsligt brotsverk

Lógaruppskot um, at lokking og kynslig avnoyðsla skulu verða kynslig brotsverk í Føroyum, er sent til ummælis. 

Í revislógini verður ikki lagt nóg nógv uppfyri, at kynsligur ágangur ímóti børnum og ungum í størri og størri mun fer á netinum. Lagt er heldur ikki uppfyri, at alnetið ger tað lætt hjá pedofilum at koma í samband við børn og ung við at geva seg út fyri at vera ein annar, stendur í uppskotinum.

Sambandið bygt upp á netinum

“Lokking” ella “grooming” vísir til ta støðu, tá ið persónur roynir at byggja upp samband við barn ella ungan undir 18 ár við ætlan um seinni at fremja kynsligan ágang móti barninum ella tí unga. Sambandið verður vanliga bygt upp á netinum.

Kynslig avnoyðsla eitur á enskum “sextortion” og er samanseting av orðunum “sex” og “extortion.” Hetta er, tá ið persónur eitt nú brúkar nakinmyndir ella annað kynsligt tilfar av órættaða til at noyða órættaða at fremja kynsligar gerðir á seg sjálvan.

Uppskotið kemur í heyst

Ummælistíðin er til 27. september.  Uppskotið verður væntandi lagt fyri tingið í heyst, og lógin skal eftir ætlan koma í gildi 1. januar 2024, sigur Løgmálaráðið.

Uppskotið kann lesast her.