Grønlendingar fyri mismuni

Frágreiðingin nevnir dømi um grønlendingar, sum hava fingið at vita frá sínum danska lærara, at grønlendingar eru alkoholikarar.

Hetta hendi, meðan flokkurin tosaði um upprunafólk í Amerika, Kanada og Grønlandi.

- Nakað av tí, vit peika á í frágreiðingini, eru serligu skyldirnar, Danmark hevur mótvegis grønlendskum lesandi.

Tað sigur Louise Holck, stjóri í stovninum fyri mannarættindi í Danmark, við grønlendska kringvarpið, KNR.

Hon sigur, at danskir útbúgvingarstovnar tí skulu royna at avmarka tær forðingar og teir trupulleikar, grønlendsk lesandi renna seg í á hægri útbúgvingum niðri.

Yvir 500 grønlendingar lesa í Danmark, og frágreiðing vísir millum annað, at fimtihvør sigur seg hava verið fyri mismuni hetta seinasta árið.