- Vit skulu vera djarvar

 - Vit skulu vera hvassar og djarvar, tí so ber til at fáa stig.

Tað segði landsliðsvenjarin, Signe Pries Andersen, við 3-2 um Nations League-dystin ímóti Kýpros, sum verður spældur í dag klokkan 17:00.

Bestu føroysku fótbóltskvinnurnar løgdu út í Nations League við tapi fyri Montenegro, men føroyska legan var nøgd við seinna hálvleik.

 - Vit skulu longur fram á vøllin, og vit skulu leggja okkara trýst ordiliga, so vit ikki skrædna, segði Ásla Johannesen um Kýpros-dystin. 

 - Vit skulu endurtaka tað, sum vit vísa í øðrum hálvleiki (ímóti Montenegro, red.), har okkara uppbyggjandi spæl riggar væl, vit finna pláss ímillum teirra ketur og koma til nøkur fín innlegg, segði Signe Pries Andersen, sum tók við landsliðsvenjarastarvinum í summar eftir Lene Terp.