Putin vitjar í Kina

Russiski forsetin, Vladimir Putin, verður við á einari ráðstevnu í Kina í morgin, upplýsir kinesiski uttanríkisráðharrin sambært almennu russisku tíðindastovuni, Tass.

Russiski uttanríkisráðharrin, Sergej Lavrov, sum er komin til Kina, sigur, at Putin fer eisini at hitta kinesiska starvsbróðurin, Xi Jinping.

Kinesiski forsetin beyð Putin á vitjan í Kina, tá hann var í Moskva í mars.

Hetta er fyrsta vitjanin hjá Putin í Kina, síðani Russland gjørdi innrás í Ukraina í februar í fjør.

Kina gjørt friðarætlan

Vesturheimurin hevur fleiri ferðir heitt á kinesisku leiðararnar um at fordøma innrásina, men tað hevur ikki eydnast.

Kina hevur fyrr lagt fram sína egnu friðarætlan fyri Ukraina, men einki ítøkiligt er komið burturúr.

Seinast, Putin var í Kina, var fyri innrásina í Ukraina. 

Tá kunngjørdu hann og Xi Jinping eina ætlan um samstarv um handil, politikk, búskap og hernaðarlig viðurskifti.

Kina hevur keypt nógv gass úr Russlandi við avsláttri, síðani Evropa sett tiltøk í verk móti Russlandi og gavst at keypa gass haðani.