Norra: Talan er um tvingsilsgjald

Nýggja loysnin gevur brúkarunum valið millum at gjalda áleið 100 krónur um mánaðin ella at lata sínar dátur verða brúktar til at vísa teimum lýsingar.

- Hetta er eitt beinleiðis tvingsilsgjald, heldur Finn Myrstad, stjóri í norska brúkaraumboðnum.

Meta eigur ikki at taka gjald fyri at tryggja brúkarum grundleggjandi rættindi, sigur Myrstad við NTB.

NRK hevur fyrr skrivað, at nýggja gjaldsloysnin kann vera í stríð við evropeiskt lóggávuverk.

- Nógv eru bundin av Facebook og Instagram til at skipa sítt lív og at varðveita sambandið við vinir og í veruleikanum er ongin onnur fullgóð loysn. Tað veit Meta sjálvandi, nú tey noyða brúkararnar til at velja, heldur Myrstad fram.

Myrstad vísir eisini á, at Meta einki sigur um, at tey fara at halda uppat við at hava eftirlit við brúkaranum og tí, sum hann ger á netinum.