Russar mótmæla at Finnland hevur stongt marknalið

Russiska uttanríkisráðið hevur nú sent finska sendiharranum í Moskva eitt alment mótmæli, eftir at Finnland í farnu viku stongdi ein part av markinum til Russlands.

Tað skrivar norska tíðindastovan NTB.

- Finska avgerðin var ov bráðfýsin, og hon ger seg inn á rættindini og áhugamálini hjá tíggjutúsundtals menniskjum báðumegin felags markið hjá londunum, sigur russiska uttanríkisráðið í mótmælinum.

Tað var fríggjadagin, at finsku myndugleikarnir boðaðu frá, at fýra av marknaliðunum til Russland fóru at verða stongd dagin eftir.

Petteri Orpo

Petteri Orpo er forsætisráðharri í Finnlandi. (Mynd: Ritzau Scanpix)

Stýra flóttafólkastreymi

Grundin er, at finsku myndugleikarnir halda, at Russland stýrir einum flóttafólkastreymi inn í landið sum hevnd fyri, at Finnland herfyri gjørdist limur í NATO.

Russisku myndugleikarnir hava avsannað hetta.

Men finski forsætisráðharrin, , sigur, at tað framvegis eru ábendingar um, at russiskir myndugleikar føra fólk, sum vilja hava friðskjól, til finska markið. Hann sigur eisini, at tað kann koma upp á tal at steingja upp aftur fleiri marknalið til Russlands.