Næstu dagarnir avgerandi

- Møguleiki er framvegis fyri, at meira groyti fer at koma upp á Reykjanesskaga-hálvoynni, sigur Páll Einarsson, sum er fyrrverandi íslendskur professari í jarðfrøði, við Morgunblaðið.

Hann sigur støðuna vera fløkta í løtuni, men at næstu dagarnir helst verða avgerandi fyri, um tað skal bera til at meta um, um groytið undir Grindavík er storknað.

- At lendið í Svartsengi er hækkað síðstu dagarnar, kundi bent á, at ein nýggj rás við groyti hevur tikið seg upp, men enn er ov tíðliga at kunna siga tað við vissu, sigur hann.

Fyri góðum tveimum vikum síðani gjørdu fleiri jarðskjálvtar um seg í Grindavík, har stórur skaði í summum førum stóðst av teimum.

Neyðugt var tá at flyta fólkið í Grindavík burtur, men eftir stórt seismiskt virksemi í eina tíð, er tað nú minkað munandi aftur.