Danmark: Milliardir til starvsfólk í almenna geiranum

Danska stjórnin og partar á almenna arbeiðsmarknaðinum eru samdir um nýggja avtalu, og ávísir starvsbólkar í almenna geiranum fáa tilsamans fleiri milliardir lønarkrónur.

Sambært DR verður peningurin býttur soleiðis, at 1,9 milliardir krónur verða settar av til 2026 til arbeiðsmegi í heilsu- og eldrarøktini.

Av teimum 1,9 mia. skulu 1,25 mia. brúkast til lønarhækking til heilsurøktarar og heilsuhjálparar. Partur av lønini verður veittur eftir starvsaldri, og til tey, sum hava arbeitt sum heilsurøktarar og heilsuhjálparar í minsta lagi í fýra ár.

1,6 milliardir eru játtaðar til at útbúgva fleiri pedagogar, og lønin hjá pedagogum hækkar eisini.  

1,9 milliardir krónur skulu brúkast til at fáa heilsustarvsfólk til at arbeiða á sjúkrahúsum og í vaktum.

Og ein góð milliard krónur verður brúkt til at fáa almenn starvsfólk upp í fulla tíð.