Svøríki nærri NATO

Svøríki er nú eitt fet nærri NATO limaskapinum. Tí Uttanríkisnevndin í turkiska parlamentinum hevur í dag góðkent svensku umbønina til at gerast limur í NATO. Tað skrivar Reuters sambært TV2.

Tað er tó bert eitt av fleiri stigum, sum politiska skipanin í Turkalandi skal taka, áðrenn limaskapurin verður veruleiki. 

Næsti leikur er, at turkiska parlamentið eisini skal atkvøða um limaskapin, men tað kann enn einaferð draga út, tí tað er ikki greitt nær tann atkvøðugreiðslan verður.

Og um so parlamentið atkvður fyri, skal tað eisini góðkennast av turkiska forsetanum Recep Erdogan, sum í fleiri umførum hevur funnist at svensku limaumbønini, og sett treytir.

Finland og Svøríki søktu bæði um NATO limaskap í senn, eftir Russland gjørdi innrás í Ukraina í Februar í fjør. Finska umbønin bleiv endaliga góðkent í apríl mánaði í ár. Londini bæði høvdu vónað, at gerast limir samstundis, men Turkaland setti seg ímóti svensku limaumbønini.

Øll limalondini í NATO skulu samtykkja nýggj limalond. Umframt Turkaland hevur Ungarn heldur ikki góðtikið limaumbønina hjá Svøríki enn.