Fronsk sendifólk útvíst

Uttanríkisráðið í Aserbadjan kallaði í gjár fronsku sendikvinnuna Anne Boillon á fund, har hon fekk handað eitt hvassorðað mótmæli um virksemið hjá fronsku stjórnarumboðunum, stendur í boðum frá uttanríkisráðnum.

Tað er ikki greitt, hvat stjórnarumboðini eru skuldsett fyri, men tey hava bæði fingið 48 tímar til at fara úr landinum.

Stjórnin í Baku hevur áður skuldsett Frakland fyri at vera í parti við Armenia, tá ið lond í Evropa vóru semingsfólk undir friðartingingum millum Armenia og Aserbadjan fyrr í ár, skrivar NTB.

Síðan í 1990-unum hevur fleiri ferðir verið kríggj millum Armenia og Aserbaidjan, og síðsti samanbresturin var so seint sum í september í ár.

Stríðið hevur staðið um umstrídda landspartin Nagorno-Karabakh, sum armensk loysingarfólk høvdu valdið á í fleiri áratíggju til Aserbaidjan tók økið í september.

Síðani eru flestu armensku íbúgvarnir flýddir úr Nagorno-Karabakh.