Meira illgruni um ritstuldur í norsku stjórnini

Enn ein norskur ráðharri er nú undir trýsti fyri ritstuldur, plagiat, í masterrigerðini.

Nú er tað heilsumálaráðharrin, Ingvild Kjerkol, úr arbeiðaraflokkinum, sum er í brennideplinum fyri ritstuldur.

Fríggjadagin mátti Sandra Borch, sum var ráðharri í útbúgving og gransking, leggja frá sær, tá tað kom fram, at hon í uppgávuni hevði brúkt tilfar hjá øðrum uttan at nevna keldur. 

Nú hevur NRK eftirkannað uppgávuna hjá heilsumálaráðharranum frá 2021 og er komið fram til, at fleiri brot í uppgávuni eru júst tey somu sum skrivað í einari uppgávu tvey ár frammanundan. Og hetta er ikki upplýst sum kelda.

Ingvild Kjerkol segði við NRK í gjárkvøldið, at uppgávurnar høvdu brúkt sama háttalag og endurgóvu tí úr somu lærubókum. 

Men aðrir norskir miðlar vilja eisini vera við, at ritstuldurin fevnir um meira enn bert háttalagið.

Og verjan hjá heilsumálaráðharranum rínir ikki við serfrøðingar, sum NRK hevur tosað við.

- Tekstlíkleikin er so stórur, at tað er ógvuliga ósannlíkt, at hesir báðir tekstirnir eru gjørdir óheftir av hvørjum øðrum, sigur John-Arne Skolbekken, professari á NTNU, sum er norska universitetið fyri tøkni og náttúruvísund.

Fyri løtu síðani boðaði Nord-Universitet frá, at tey fara at kanna ákærurnar um ritstuldur í masterritgerðini hjá Ingvild Kjerkol.