07 Vestur fekk alt eftir brent ÍF-brotsspark

ÍF fekk ein gyltan møguleika at javna í heimdystinum ímóti 07 Vestur, men Karl Løkin misnýtti brotssparkið, og so fóru vágamenn vestur aftur við øllum.

Sigursmálið hjá 07 Vestur kom seint í fyrra hálvleiki, tá Filip Brattbakk skoraði eftir upplegg frá fyrrverandi superliga-spælaranum, Fredrik Holst, sum skrivaði undir á Dungasandi fyri kortum.

Við Margáir legði útiliðið, B68, seg á odda tíðliga við máli frá Villiami Klein, men tá Fríði í Túni Petersen fekk sítt seinna gula kort beint fyri steðgin, var mótbrekka hjá B68 eftir steðgin.

Tað gingu bert góðir 10 minuttir til Tóki Johannesen javnaði fyri EB/Streym, og so fingu bæði liðini síni fyrstu stig í ár.

Víkingur og B36 fult stigatal

Fríggjakvøldið vann Víkingur á HB í Sarpugerði við málum frá Gezá Dávid Turi og Finni Justinussen, og í gjár eydnaðist B36 at vinna á føroyameistaranum, KÍ, á Ovara vølli í Gundadali, har nýggi maðurin, Anton Søjberg Horup, skeyt bæði málini seint í dystinum.

Hetta merkir, at Víkingur og B36 eru einastu liðini, sum hava fult stigatal, nú kappingin fer í stuttan landsliðssteðg. Einasta liðið, sum ikki hevur fingið stig enn, er ÍF.

Føroyska landsliðið spælir í næstum venjingardystir ímóti Liktinstein og Danmark.