Tingið samtykkir lógina um brekumboðið í dag

Løgtingið fer í dag undir at viðgera tey nógvu málini, sum komu seinasta framløgudagin, 7. mars.

Átta fyrstu viðgerðir eru í dag.

Millum uppskotini, sum eru á skránni hjá tinginum í dag, eru pantiskipan fyri íløt, projektering av felagsbygningi til kampuss, uppihaldsloyvi til 250 flóttafólk úr Ukraina, 50 fleiri enn í galdandi lóg, og ílegulógin.

Men fyrst á skránni eru onnur viðgerð og átkvøðugreiðsla um brekumboðið.

Trivnaðarnevndin er samd um at taka undir við uppskotinum hjá Sirið Stenberg, landsstýriskvinnu, um brekumboð.

Brekumboðið skal hava eftirlit við, at føroysk lóggáva og tilboð og føroyskar tænastur eru í samsvari við ST sáttmálan um rættindi hjá einstaklingum, sum bera brek.

Tingfundur eru hvønn dag í hesi vikuni.