Í seinasta lagi um eitt ár byrjar arbeiðið at gera berghol til Tjørnuvíkar

Grivið verður til bergholsmunnan við Marmaskallará norðan fyri Haldarsvík seinast í hesum árinum ella fyrst í 2025.  

Tað sigur Dennis Holm, landsstýrismaður, um bergholið til Tjørnuvíkar.

Jóhannis Joensen, løgtingsmaður, spurdi um bergholini til Dals og til Tjørnuvíkar.

Um bergholið til Tjørnuvíkar svarar Dennis Holm, at søkt verður nú um loyvi frá friðingarmyndugleikum til at kunna gera bergholið.

Og lendið báðumegin munnarnar verður keypt. 

Innanfyri eitt ár

Hann sigur, at roknað verður við, at grivið verður til munnan við Marmaskallará um átta til tólv mánaðir.

Tað veldst um, hvussu gongst at fáa neyðug loyvi og at keypa lendi, svarar landsstýrismaðurin..

Bergholið verður frá Marmaskallará, norðan fyri Haldarsvík, til dalin í Tjørnuvík. 

Tað verður 2,3 kilometrar.

Um bergholið til Dals sigur Dennis Holm, at tað verður væntandi liðugt í 2026. 

Í løtuni er arbeiðið inni í bergholinum nakað seinkað, tí neyðugt er at søkja eftir nýggjum fólkum til bergholsarbeiðið, sigur landsstýrismaðurin.