Tvær stroymingartænastur fara at vísa Premier League

Tað verður bæði dýrari og tvørligari at síggja Premier League næsta kappingarár. Tað skriva fleiri norðurlendskir miðlar. 

Viaplay hevur selt ein part av Premier League dystunum til Amazon, og tað merkir, at tú mást hava tvær ymiskar stroymingartænastur, um tú vilt tryggja tær, at tú sært allar dystirnar í Premier League næsta kappingarár. 

Viaplay og Prime Video stroymingartænasturnar fara at senda Premier League dystirnar. 

Viaplay

Viaplay hevur selt ein part av dystunum, tí fyritøkan er í tungum sjógvi fíggjarliga. (Savnsmynd)

Leygardagsdystir á Prime Video

Talan er um dystir, sum eru á skránni leygardagar kl 12.30.

Hetta merkir í stuttum, at um fólk vilja síggja Premier League leygardagar kl. 12.30, so nyttar einki at fara á Viaplay, tí teir dystirnir verða vístir á Prime Video, sum Amazon eigur. 

Orsøkin til avgerðina um at selja ein part av dystunum er fíggjarlig. Viaplay hevur verið í tungum fíggjarligum sjógvi og hevði eitt undirskot upp á beint oman fyri seks milliardir krónur í fjør. 

- Vit hava gjørt eina avtalu við Amazon, sum fevnir um nógv annað enn ítrótt, sum vit meta sum heild, at tað er tað rætta at gera. Hetta er ikki fyrstu ferð, at vit deila rættindi við samstarvsfelagar, sigur Lars Bo Jeppesen, stjóri í Viaplay Danmark, við danskar miðlar. 

Ikki bíligari

Hóast Viaplay fer at vísa færri dystir í hvørjum umfari, merkir tað ikki, at Viaplay-haldið verður bíligari. 

- Nei, vit seta ikki prísin niður. Vit stremba eftir at hava kappingarførar prísir á okkara ítróttatilfari. Av og á vinna vit okkum fleiri rættindi og onkuntíð missa vit tey, sigur stjórin í Viaplay Danmark.